Muška juniorska reprezentacija nastup na Evropskom prvenstvu B divizije za igrače do 18 godina u Sarajevu završila je na petom mjestu - izabranici Dragana Radovića u meču za peto mjesto savladali su Estoniju 85:77 (15:23, 19:16, 20:18, 31:20). Estonija je nakon tri četvrtine imala tri poena prednosti (57:54), ali je naša selekcija do pobjede došla zahvaljujući odličnoj igri u posljednjoj četvrtini. ''Crveni'' su nastup na šampionatu u Sarajevu završili sa šest pobjeda i tri poraza.

Juniorska reprezentacija osvojila je peto mjesto na Evropskom prvenstvu B divizije u Sarajevu - izabranici Dragana Radovića u meču za peto mjesto savladali su Estoniju 85:77 i šampionat završili sa učinkom od šest pobjeda i tri poraza.

Estonija je imala prednost do početka posljednje četvrtine - nakon prve dionice vodila je 23:15, nakon prvog poluvremena imala je pet poena prednosti (39:34), a u posljednjih deset minuta ušla je sa ''plus tri'' - 57:54.

Na početku posljednjeg perioda, Mašan Vrbica je trojkom donio izjednačenje (57:57), a nakon što je Estonija u 33. minutu povela 63:61, naša selekcija napravila je seriju 9:0, kojom je došla do sedam poena prednosti - 70:63 u 35. minutu.

Sve dileme oko pobjednika rješene su u 38. minutu, kada je Vasilije Vušović pogodio trojku za nedostižnih 11 poena prednosti - 80:69.

Najefikasniji u našoj selekciji bio je Mašan Vrbica sa 22 poena, a imao je i pet skokova i četiri asistencije, a dvocifren učinak imali su još Vasilije Vušović (13), te Vaso Popović i Milija Miković koji su upisali po 11 poena.

Plasman u A diviziju izborili su finalisti šampionata u Sarajevu - Bosna i Hercegovina i Češka, a posljednjeg putnika u elitni rang evropske košarke, odlučiće meč za treće mjesto u kojem se sastaju Engleska i Finska.